Eit dystopisk storverk for unge vaksne

Sturla Bang og Hilde K. Kvalvaag avsluttar den dystopiske trilogien Søsteranarkistane. I Søsteranarkistane møter vi barneheimsjenta Ela, som gjer opprør mot tyrannen Ingmor. Ela arbeidar som slave på fabrikken i byen SDK Zeijang-Volvo. Tyrannen Ingmor styrer alt og alle med jernhand. Verda slik vi kjenner henne, er gått til grunne. Ein dag får Ela nok av undertrykkinga og manar til opprør. Det er farlegare enn ho anar, for Ingmor treng noko berre Ela har.

Søsteranarkistane er eit dystopisk storverk, ei fengslande framtidsforteljing skriven av forfattarduoen Sturla Bang og Hilde K. Kvalvaag. Forteljinga går føre seg i ei verd der dei unge står mot det gamle i ein kamp om kven som skal leve eller døy. Bang og Kvalvaag har skapa eit rikt univers som er både språkleg oppfinnsamt med innslag av svensk, kinesisk og russisk, og intenst spennande. Trilogien består av bøkene Under (2017), Over (2019) og Ut.

Sturla Bang debuterte med Under i 2017. Hilde K. Kvalvaag har skrive fleire bøker for ungdom og vaksne, og fekk Brageprisen for ungdomsromanen Fengsla i 2010.