Pressemelding -
Teater ute og Slåttekaren i strøymeversjon
Førstkomande laurdag er første gongen Det Norske Teatret spelar teater for publikum sidan Oslo blei stengt i november, med vandreframsyninga GÅ. Samstundes utvidar teateret tilbodet med direktestrøyming av teater med enno ei framsyning. Heile landet kan no få med seg Slåttekar i himmelen heime i eiga stove.
SLÅTTEKAR I HIMMELEN
av Edvard Hoem
DIREKTESTRØYMING TORSDAG 28. JANUAR KL. 20.00
DIREKTESTRØYMING LAURDAG 13. FEBRUAR KL. 18.00
I DI EIGA STOVE
GÅ
av Goksøyr/Martens
FRÅ LAURDAG 23. JANUAR KL. 14.00
UTANDØRS, oppmøte ved hovudinngangen til Det Norske Teatret
Slåttekar i himmelen hadde urpremiere laurdag 7. mars, og rakk ikkje fleire framsyningar på Det Norske Teatrets Hovudscene før landet stengte ned som følgje av pandemien. I haust var framsyninga på ein vellukka vestlandsturne i regi av Teatret Vårt og fekk også spele nokre få framsyningar i hovudstaden før ny nedstenging blei innført. Det Norske Teatret har likevel tru på at framsyninga kan møte eit avgrensa publikum i Oslo seinare i vårsesongen, men vil no tilby denne opplevinga til alle gjennom direktestrøyming av framsyninga. Både i januar og februar kan publikum sjå ein versjon i sanntid som er lagt til rette for fleire kamera og som følgjer tett på Slåttekarens historie frå Edvard Hoems romanserie om Nesjefolket. Det er det næraste ein kjem teater i det store formatet i denne perioden, og du kan sjå det kor som helst, berre ikkje frå salen på Det Norske Teatret.
Direktestrøyminga av Slåttekar i himmelen skjer 28. januar og 13. februar.
Før framsyninga vil publikum også få med seg ein samtale mellom forlagssjef i Oktober Forlag Ingeri Engelstad og forfattaren Edvard Hoem, som har skrive denne historia basert på si eiga familiehistorie og sin eigen oldefar.
GÅ - gjennom Oslos gater
Pandemien tvang også fram nye tenkemåtar. Goksøyr/Martens hadde lenge gått med ideen om ei framsyning om døden, og no fann denne si form gjennom ei auditiv vandring gjennom Oslos gater på trygg avstand frå kvarandre. Framsyninga GÅ handlar om å miste. Hovudkarakteren ein får vere i hovudet til har mista familien gjennom eit samlivsbrot, og mister mor si, utan å få vere til stades.
GÅ har si første vising sidan november den 23. januar.
Emner
Kategorier
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.
