Pressemelding -
Svein Tindberg får Vennelagsprisen 2022
I går kveld mottok Det Norske Teatrets skodespelar Svein Tindberg Vennelagsprisen 2022 frå Venner av Det Norske Teatret.
Prisen er på 30.000 kr., og skal i følgje vedtektene bli gitt til ein som er fast tilsett ved Det Norske Teatret, og som har gjort ein viktig innsats for teateret i seinare tid.
Svein Tindberg er ein utøvande kunstnar som gjennom mange år har via sitt engasjement til tematisering av religiøse spørsmål og gudstru. Størst suksess har han hatt med einmanns-framsyningane Evangeliet etter Markus i 1995, Apostlenes gjerninger i 2000 og Abrahams barn i 2011/2012 på Det Norske Teatret, der dei tre verdsreligionane jødedom, kristendom og islam står sentralt.
I grunngjevinga for tildelinga frå Venner av Det Norske Teatret heiter det vidare:
"Monologframsyningane syner tru på dei religiøse tekstene si eiga formidlingskraft, og slik har Svein Tindberg medverka til å fornye forteljartradisjonen kring denne typen tekster.
I 2021 kom den fjerde framsyninga i rekkja, Gudspartikkelen, også denne i samarbeid med instruktør Kjetil Bang-Hansen, som dei tre ovannemnde framsyningane. For styret i Vennelaget er det i særleg grad Gudspartikkelen som ligg til grunn for tildelinga av Vennelagsprisen. Svein Tindberg fortel at han har kjent ei konflikt i seg sjølv mellom tru og rasjonalitet, og ønskjer å stille dei store spørsmåla: Finns Gud, eller finns ikkje Gud? Dette har gjeve oss ei framsyning som er ein eineståande kunstnarleg prestasjon, og det er stor formidlingskunst om særdeles viktige tema. Ikkje minst i den tida vi lever i nå treng vi ei slik tankevekkande, grenseoverskridande, varm og også humoristisk forteljing."
Kontaktpersonar i Venner av Det Norske Teatret:
Kjell Austin, leiar4150 9460 / kaustin@online.no
Yngvil Kiran, nestleiar4812 8027 / yngvil.kiran@gmail.com
Emner
Det Norske Teatret er Noregs største teater for refleksjon, oppleving og underhaldning. Teateret ligg sentralt i hovudstaden i eit moderne teaterbygg frå 1985 med 3 faste scenar, og over 250.000 publikummarar årleg.