Må menn bli superheltar for å takle livet?

Mange menn slit. Gutar gjer det dårlegare enn jenter på skolen. Dobbelt så mange middelaldrande menn som kvinner, er single. Menn slit med å snakke om kjensler, og å takle når livet buttar imot. Magnus i Captain Amazing finn imidlertid ei løysing: Han blir til ein superhelt.

CAPTAIN AMAZING - ELLER KUNSTEN Å FLY
NOREGSPREMIERE TORSDAG 1. SEPTEMBER KL. 20.00
SCENE 3

- Det handlar om utanforskap, om å ikkje henge med i karrierelivet og kjærleikslivet... I det heile om det å ta ansvar for livet sitt. Og det klarar ikkje Magnus som Magnus, han må bli Captain Amazing. Da kan han takle alt, trur han, seier skodespelar Niklas Gundersen, som for første gong skal stå mutters aleine på scenen. 
I den kvikke monologen Captain Amazing - eller kunsten å fly skal han spele rundt 15 ulike karakterar, mellom andre dottera, eksen, Batman, sjefen, Supermann - og ein pappa som gjer sitt ytste for å vere superhelt både for barnet han elskar og i livet generelt.

Komedie med alvor

Når dottera blir sjuk, skapar Magnus eit fiksjonsunivers der han er helten, men etterkvart glir fiksjonen over i det verkelege livet. Det fungerer imidlertid ikkje heilt etter planen når han troppar opp på jobben med superheltkappe, eller ber om at dansegolvet ute på byen skal ryddast før han - iført kappe - utfører sin eigen superheltdans.
- Captain Amazing fortel ei sår, men svært underhaldande, historie om ein mann som prøver å fly, eller takle livet, rett og slett. Og for å få til det, krevst ikkje berre glade tankar. Det er ein jobb, forklarar Gundersen.

Farsott frå Storbritannia

Alistair McDowalls kjappe monologtekst starta som eit einmanns-standupshow og enda opp som ein teatermonolog. I 2013 hadde framsyninga premiere på den anerkjende Edinburgh Fringe-festivalen, og gjekk deretter sin sigersgang frå teater til teater i Storbritannia. Den underfundige blandinga av humor og tragedie, attkjenneleg kvardag, observasjonane av det store i det vesle i livet, og sorga over at livet tek tragiske vendingar trefte publikum rett i hjartet.