Internasjonal Fosse-festival for andre gong

Årets Fossefestival kan skilte med eit spekka program med eigenproduksjonar og gjestespel - også frå utlandet, i tillegg til eit breitt samansett sideprogram.

DEN INTERNASJONALE FOSSEFESTIVALEN
3. - 12. SEPTEMBER
DET NORSKE TEATRET
Les heile programmet for Fossefestivalen her

Fossefestivalen er ein arena for dramatikk som er skrive etter Jon Fosses dramatikardebut i 1994. Festivalen skal romme både internasjonale gjestespel og eigne produksjonar, samt eit fagprogram som tar sikte på å utforske dramatikken frå ulike perspektiv. Kva er dramatikk? Korleis spelar det litterære forelegget saman med dei andre kunstartane som til saman utgjer ei teaterframsyning?

I tillegg til Det Norske Teatret sine eigne framsyningar;Trilogien som kjem tilbake, urpremiere på Oresteia og Fosses nye stykke Sterk vind  og ikkje minst Mari Hesjedals Sov ikkje, blir det gjestespel, foredrag og samtalar. Kort sagt – festival! Den internasjonale Fossefestivalen 3. - 12. september vil ikkje berre legge til rette for gode teateraugneblinkar, men òg gi høve til å diskutere det moderne teateret og den moderne scenekunsten - og til å vende tilbake til teatret.

Tre eigne premierar på rad
Festivalen blir sparka igang med urpremieren på Oresteia  - Fosses versjon av Orestien av Aiskylos - 3. september på Hovudscenen med Eirik Stubø som regissør. 4. september blir det premiere på eit flunkanden nytt Fosse-stykke, trass i at Jon Fosse sjølv har svore på at han ikkje skulle skrive meir for teater. Sterk vind blir regissert av Johannes Holmen Dahl, og blir vist på Scene 2. Den 5. september blir det premiere på eit stykke av ein av dramatikarane som kjem i kjølvatnet av Jon Fosse, nemleg Mari Hesjedal. Sov ikkje blir vist på Scene 3, og Iram Haq debuterer som teaterregissør med denne framsynina. 

Lansering av nytt romanverk på første festivaldag
Same dag som Oresteia har premiere på Det Norske Teatret lanserer Jon Fosse og Samlaget tredje band i romanserien Septologien på teatret. Verket fekk tittelen fordi det naturleg deler seg i sju. Dei første romanane i verket har hausta strålande kritikkar og er selt til ei rekke land.

Gjestespel, samtalar og Fosse for dumskallar
Til Fossefestivalen kjem det anerkjende skodespelarkompaniet tgStan frå Belgia. Dei vil gjere sin versjon av Eg er vinden på Scene 3. Lagnaden ville ha det til at Stavros Niarchos Foundation Cultural Center S.A. frå Athen i Hellas har enda opp med å legge sjølv premieren på sin Nokon kjem til å kome til Hovudscenen på Det Norske Teatret. Elles kjem Linda Eide til å gi ei lettbeint innføring i Fosse for dei som synest han kan vere litt vrien å kome innpå, og dette blir også sendt via direktestrøyming til heile landet. I tillegg blir det gjestespel med Anne Marit Jacobsens Ro mitt hav, samtalar om alt frå myter, Gud og mat i Fosses forfattarskap. Med meir!

Festivalen er arrangert av Det Norske Teatret og Det Norske Samlaget.