Hkeem debuterer på teaterscenen

Abdulhakeem Hassane - eller Hkeem, som dei fleste kjenner han som - har faktisk drøymt om å stå på ein teaterscene lenger enn han har vore rappar. Denne våren blir det verkelegheit - og det med si eiga ærlege historie.

ABDUL ≈ HKEEM
av Hannah Wozene Kvam og Abdulhakim Hassane
URPREMIERE 29. MARS KL. 19.30
ROMMEN SCENE, DET NORSKE TEATRET I GRORUDDALEN

For to år sidan satt kunstnarleg leiar ved Det Norske Teatret i Groruddalen, Belinda Braza, og såg på Hver gang vi møtes på TV2. Der var Abdulhakim Hassane mellom deltakarane. Plutseleg sa Hassane at han alltid hadde drøymt om å spele teater. Dagen etter slo Braza på tråden til Hassane - som faktisk allereie var i dialog med regissør Cliff Moustache om å gjere noko i lag. Som sagt - så gjort. 29. mars er det endeleg premiere, og Hkeem står for første gongen på teaterscenen - men denne gongen er det som Abdulhakeem.

Bak fasaden

Gjennom dialogar, monologar og eigne songar vil Abdulhakeem Hassane gå bak fasaden til den sjølvsikre artisten Hkeem og vise kven han er. Han vil dele episodar og hendingar frå livet som har prega han og gjort han til den han er i dag. ABDUL ≈ HKEEM er ei oppvekstforteljing om ein gut frå Stovner som har forsøkt å navigere mellom ulike kulturar ute og heime, som har ei mor frå eit anna land og ein fråverande far. Det handlar om venner, einsemd, rasisme, kjærleikssorg og det å prøve å passe inn. Og om å bere på ein draum om bli noko stort og kunne bety noko for andre. For Hassane er det å treffe ungdom og gi dei håp om at dei også kan få til noko i livet den største draumen.