Endeleg premiere på Into the Woods

- Eg har venta på å spele heksa i Into the Woods i 20 år, da kan eg saktens vente ett år til, var Heidi Gjermundsen Brochs lakoniske kommentar da produksjonen blei koronautsett i ett år etter prøvestart i fjor. No blir det endeleg premiere - og endeleg får Gjermundsen Broch spele drøymerolla - med laustenner og fingrer som slår gneistar.

INTO THE WOODS
AV STEPHEN SONDHEIM OG JAMES LAPINE
NOREGSPREMIERE LAURDAG 2. APRIL KL. 18.00
HOVUDSCENEN

I lag med Gjermundsen Broch er det eit sprekkeferdig ensemble og eit fullsett orkester som ser fram mot å endeleg møte publikum og vise fram Stephen Sondheim og James Lapines eventyrlege musikal. Her møter vi også andre kjente karakterar som Raudhette (Ina Svenningdal), ulven (Pål Christian Eggen), Oskepott (Mimmi Tamba), Rapunsel (Julie Støp Husby) og mange fleire. Dei blir alle viktige brikker i oppfyllinga av bakaren (Kristoffer Olsen) og bakarens kone (Kjersti Dalseide) sitt største ønske; å bryte ei forbanninga heksa har kasta over dei slik at dei kan få eit barn. For å bryte forbanninga, må dei inn i skogen for å finne hår så gult som korn, ein sko av det reinaste gull, ei kappe så raud som blod og ei ku så kvit som mjølk..

Ikkje eventyr for barn

Med humor og råskap har Stephen Sondheim og James Lapine laga ein musikal som snur dei kjente eventyra på hovudet. Resultatet er ein vaksen skrekkversjon av barndommens forteljingar. I Erlend Birkelands scenografi er skogen blitt eit overgrodd og gudsforlate hus. Kostyma til Maria Geber er detaljrike og fortrollande, Omsetjar Runar Gudnason, kjend som frontfigur i Ørsta-rapgruppa Side Brok, har tatt godt hand om både humor og vidd i overføringa til norsk, og musikalsk ansvarleg og kapellmeister Svenn Erik Kristoffersen har styringa på Sondheims avanserte orkestreringar, rytmer og melodiar. Regissør Ole Anders Tandberg har det øverste ansvaret for at alle bitane spelar saman.

Musikallegende 

Stephen Sondheim er ein legende innan musikalteatret, og var rekna mellom dei fremste blant musikalskaparane, den mest anerkjende og innflytelsesrike innan amerikansk teater og den kreative krafta bak nokre av Broadways mest omtala og bejubla musikalar, som West Side Story, Sweeney Todd, Companys, Follies og A Little Night Music. Into the Woods hadde urpremiere i 1986, og blei honorert med Tony Award både for beste musikk og manus. I 2014 fekk musikalen fornya aktualitet gjennom Disneys filmatisering med Meryl Streep i rolla som heksa. Det Norske Teatret har lang tradisjon for å spele Sondheimmusikalar, men det er ekstra spesielt å ha noregspremiere på ein musikal signert mannen som sitte tydelege preg på eit halvt hundreår innan musikkteateret, eit knapt halvår etter han gjekk bort.