Pressemelding -
Solrun Hjelleflat sluttar som toppsjef i Norway's best
Solrun Hjelleflat har beslutta å fråtre stillinga si som Administrerande direktør/CEO i Aurland Ressursutvikling AS (ARU)/ Norway’s best AS med umiddelbar verknad. Styret har konstituert CFO Frode Rokne som ny adm. dir., og vil starte prosessen med å tilsette ny CEO så snart som mogleg.
Hjelleflat har leia selskapet sidan hausten 2011, og har styrt selskapet gjennom ei formidabel utvikling. I hennar tid er Flåm bygd opp som eit fyrtårn i norsk reiseliv og selskapet er blitt ein profesjonell reiselivsaktør i nasjonal samanheng. Etter fusjonen med Myrkdalen Fjellandsby i 2020 vart Aurland Ressursutvikling AS ein av Noregs største reiselivsaktørar, med ein årleg omsetnad på 1 milliard kroner for alle tilknytte selskap, 500 heilårs- og deltidstilsette og meir enn 1,2 millionar gjester i året frå heile verda.
– Hjelleflat har vore ein visjonær og ambisiøs leiar. Ho har lagt ned stor innsats i å gjere reiseliv til heilårs næring og utvikle kompetansearbeidsplassar i distriktet. Sentralt i dette har vore produkt- og organisasjonsutvikling, marknadsorientering, merkevarebygging og satsing på teknologi, seier styreleiar i ARU Øyvind Hasaas.
Covid-19 har råka reiselivet hardt, men også i denne perioden har Hjelleflat stått i stormen, styrt selskapet med stø hand og tort å satse for å komme styrka ut av pandemien. – Selskapet takkar Hjelleflat for den store innsatsen ho har lagt ned, og ynskjer ho lykke til vidare, seier Hasaas.
– Det har vore ei glede å samarbeide med so mange dyktige kollegaer i desse åra, og eg er stolt av at vi saman har gjort Norway’s best til ein av Europas leiande reiselivsbedrifter, og ikkje minst lukkast med å skape mange heilårs arbeidsplassar i distrikta, seier Solrun Hjelleflat.
Kontaktperson:
Øyvind Hasaas, Styreleiar i Aurland Ressursutvikling AS og Norway’s best AS
E-post: Oyvind.hasaas@avinor.no
Mobil: + 47 915 10 014
Kategorier
Norway’s best AS er eit av landets største reiselivsselskap som eig, utviklar og driv norske kvalitetsreisemål og reiselivsprodukt i verdsklasse. Norway’s best AS (tidlegare Flåm AS) har i over 20 år posisjonert Flåm med Flåmsbana og Nærøyfjorden til å bli eit av Norges største turistreisemål. I dag har selskapet aktivitet i Flåm, Aurland, Myrkdalen, Geiranger, Lysefjorden, Hjørundfjorden, Hardanger, Lofoten og Narvik. Norway’s best AS er eigd av Aurland Ressursutvikling som i 2019 hadde ei omsetnad på over NOK 1 mrd, meir enn 500 heilårs- og deltidstilsette og meir enn 1,7 millionar gjester. Aurland Ressursutvikling eig Myrkdalen Fjellandsby 100%, 50 % av Flåmsbana, 50 % av The Fjords og 33,5 % av Arctic Train. I tillegg eig og driv selskapet fire hotell, 14 restaurantar og eit bakeri. All marknadsføring, sal og tilrettelegging skjer gjennom det heileigde dotterselskapet Norway’s best AS.