Nye leilegheitsbygg i Myrkdalen: Spaden er i jorda

Bygging av dei to leilegheitsbygga, Sendo og Skabotn, i sentrum av Myrkdalen er vedteke og første spadetak vart satt 2. mai 2023. Prosjektet er ein del av ei større utbygging av sentrumsområdet.

-Utbygginga av Sendo og Skabotn er ei strategisk viktig satsing for å styrke attraktiviteten til Myrkdalen, og det er gjennom sentrumsutbygginga at me for alvor tek opp konkurransen med andre fjelldestinasjonar i Norge, seier Per Brochmann, konsernleiar i Aurland Ressursutvikling.

Startskotet på den vidare utbygginga av fjellandsbyen
Veidekke Entreprenør AS er vald som totalentreprenør for prosjektet, og planen er å ha tett bygg til jul 2023. Overlevering er estimert til fjerde kvartal i 2024. Prosjektet er finansiert gjennom eigenkapital frå Myrkdalen Fjellandsby as og lån frå Sparebanken Vest.

Som meldt tidlegare vart heile bygget kalla Skabotn solgt til Vårstølen Utleige AS i april, i tillegg er 10 av 22 leilegheiter i Sendo solgt. Meir om dette, bygga og Vårstølen Utleige, kan du lesa i denne pressemeldinga.

Sendo og Skabotn er ein viktig del av oppbygginga av sentrum i Myrkdalen, og er sjølve startskotet for den vidare utbyggingsfasen av fjellandsbyen og fortettinga kring hotellet i Myrkdalen. I dei neste åra vil ein bygge om lag 600 leilegheiter, næringsareal, velkomstsenter, aktivitetar for born/ungdom, fleire serveringsstader, samt utvikle felles fasilitetar som parkering, busshaldeplass, grønt areal etc.

Framifrå lagarbeid
-Sendo og Skabotn hadde ikkje vore mogleg å realisere utan eit framifrå lagarbeid mellom grunneigarar, Vårstølen, Veidekke, Sparbanken Vest og ikkje minst eigedomsteamet i Myrkdalen Fjellandsby as. Tilstrekkeleg sal og byggestart våren 2023 har vore eit mål me har kjempa mot heile vinteren, og me er godt nøgde med å ha nådd dette målet, særleg sett i ljos av ein vanskeleg marknad, seier Frode Rokne, eigedomsansvarleg i Myrkdalen.