Myrkdalen møter hausten med latter

Siste helga i september kan du få trimma lattermusklane dine i Myrkdalen. Då går første utgåve av Fjellatter av stabelen ved Myrkdalen Hotel, med mange velkjente stand-up komikarar på programmet.

- I Norway’s best jobbar vi stadig med å utvikle nye konsept for gjestene våre, og særleg det å skape større attraktivitet utanom høgsesong. Myrkdalen har over tid etablert fleire årlege arrangement. Med Fjellatter ynskjer vi å treffe nye målgrupper på ei tid på året då det tradisjonelt er litt rolegare, seier Bent-Cato Danielsen, driftsdirektør i Norway’s best AS.

Norway’s best kan by publikum på eit omfattande utval av komikarar under historias første Fjellatter. På programmet finn ein fleire prisvinnande artistar, og namn som Christoffer Schjelderup, Dag Sørås, Trine Lise Olsen, Sandra Spjelkavik, Jonas Rønning og Jonna Støme.

- Vi meiner å ha sett saman eit program med høg kvalitet. Vi har også lagt stor vekt på at det skal vere noko for ein kvar smak, derfor køyrer vi to hovudforestillingar både fredag og laurdag. I tillegg blir det late show med lokale stand-up artistar. Med Fjellatter ynskjer vi å rette oss mot fleire marknader og målgrupper. Vi håpar derfor at både hyttegjester, regionale og nasjonale gjester vil finne vegen til Myrkdalen siste helga i september, seier Danielsen.

Det er sjølvsagt latteren som vil stå i høgsetet denne helga, men arrangøren byr også på gode matopplevingar og aktivitetar utandørs for både store og små.

- Målet er å etablere Fjellatter som eit årleg arrangement. No skal vi først teste ut korleis dette slår an, så vil evalueringa vise oss kva framtida blir. Vi må aldri gløyme å ha det kjekt, det håpar vi Fjellatter vil bidra til, avsluttar Danielsen.

For meir informasjon kontakt

Bent-Cato Danielsen

Driftsdirektør i Norway’s best AS

bent-cato.danielsen@norwaysbest.com tlf. 463 60 616

Om Norway’s Best Group AS

Konsernet Norway’s Best Group AS (NBG) er eigd av SIVA Eiendom Holding AS, Aurland Eige AS, Sogn Sparebank og Schage Eiendom AS.

NBG eig Norway’s best, Myrkdalen Fjellandsby, The Fjords og 50 % av selskapet som driv Flåmsbana. All marknadsføring, sal, drift og tilrettelegging skjer gjennom det heileigde dotterselskapet Norway’s best AS, som også driv 4 hotell, 14 serveringsstader og kundesenter. Selskapet sine produkt og opplevingar har i eit normalår opp mot 1,5 millionar gjester.